Ես գիտեի հաստա՛տ,

Ես գիտեի վաղո՜ւց:

Դա գիտեի՝ նույնիսկ քո ծննդի՛ց առաջ:

 

Ես սպասում էի և գիտեի՝

Կգա՜ս:

 

Եվ գիտեի նաև, որ ինձ համար

Քո գալստյան օրը պետք է լինի

Սարսափելի, բայց և հանդիսավոր այնքան,

Որքան հավատացյալ մարդու համար

Ակնկալված օրը Ահեղ Դատաստանի:

 

Հավատացյալն եմ ես մշտայցելու սիրո,

Եվ օրերի օրը հասա՜վ. 

-Եկա՛ր:

 

Գործած և չքաված իմ մեղքերի ծովից

Ես դուրս եկա մաքուր՝ որպես որոր ճերմակ:

 

Եվ ինձ պետք չէր դրախտ կամ եդեմյան այգի.

Քաղաքամերձ անտառ և այգիներ կային...